मनकामनामा चाँडै "रिसोर्ट बाइ मनकामना" नामको तारे होटल सञ्चालनमा
गोरखा, मनकामना —
नेपालकै चर्चित धार्मिक तथा पर्यटकीय स्थल मनकामनामा अब चाँडै नयाँ तारे होटल सञ्चालनमा आउने भएको छ। "रिसोर्ट बाइ मनकामना" नाम दिइएको यस नयाँ परियोजनाले आन्तरिक तथा बाह्य पर्यटकहरूलाई लक्जरी अनुभव प्रदान गर्ने लक्ष्य लिएको छ।
मनकामना केबलकार कम्पनीको प्रत्यक्ष सहकार्यमा तयार हुँदै गरेको यो रिसोर्ट उच्चस्तरीय सुविधासहित निर्माणाधीन अवस्थामा रहेको छ। सञ्चालक समितिका अनुसार, रिसोर्टमा अत्याधुनिक कोठाहरू, स्विमिङ पुल, सम्मेलन हल, मल्टिकुजिन रेस्टुरेन्ट, स्पा तथा योगा केन्द्रजस्ता सेवा सुविधाहरू समेटिनेछन्।
"हामीले धेरै वर्षदेखि आउने श्रद्धालु र पर्यटकहरूका लागि थप सुविधा सम्पन्न सेवा दिन चाहेका थियौँ। अब त्यो सपना 'रिसोर्ट बाइ मनकामना' मार्फत साकार हुने छ," परियोजना संयोजकले बताए। उनका अनुसार, रिसोर्टले नजिकैको मनोरम प्राकृतिक दृश्यलाई ध्यानमा राखेर डिजाइन गरिएको छ, जसले अतिथिहरूलाई आध्यात्मिक शान्ति र आधुनिक सुविधा दुवैको अनुभव दिनेछ।
मनकामना क्षेत्रका व्यवसायी र स्थानीय बासिन्दाहरूले पनि यस परियोजनालाई स्वागत गरेका छन्। उनीहरूको भनाइमा, नयाँ रिसोर्टले पर्यटन प्रवर्द्धनमा टेवा पुर्याउनुका साथै स्थानिय रोजगारीका अवसरहरू पनि सिर्जना गर्नेछ। "अब हामी मनकामनामा केवल दर्शन मात्र होइन, विश्राम र रमाइलोको नयाँ अनुभव पनि पाउनेछौँ," स्थानीय व्यवसायी कुलबहादुर श्रेष्ठले प्रतिक्रिया दिए।
यसैबीच, टुर एजेन्टहरूले समेत रिसोर्टको सञ्चालनले पर्यटन व्यवसायमा नयाँ गति आउने विश्वास व्यक्त गरेका छन्। काठमाडौंमा आधारित एकजना टुर अपरेटर सुमन तामाङ भन्छन्, "मनकामनाको यात्रालाई लक्जरी र सुविधाजनक बनाउन यस्तो रिसोर्टले ठूलो भूमिका खेल्नेछ। विदेशी र उच्चस्तरीय आन्तरिक पर्यटकहरूलाई आकर्षित गर्न अब सजिलो हुनेछ।"
त्यस्तै, पोखराका अर्को टुर एजेन्ट सञ्जीव अधिकारीले भने, "मनकामना घुम्न आउनेहरूलाई अब रातभर बस्ने वा विश्राम गर्ने विकल्प पनि मिल्नेछ, जसले हाम्रो प्याकेज र अफरहरू थप समृद्ध बनाउन मद्दत गर्नेछ।"
टुर एजेन्टहरूका अनुसार, भारतीय पर्यटकहरू नेपालका हिलस्टेशनहरूमा बस्न अत्यधिक रुचाउने गर्दछन्। तर मनकामनामा यस्ता स्तरीय रिसोर्टहरूको अभावका कारण समस्या देखिएको थियो। अब "रिसोर्ट बाइ मनकामना" सञ्चालनमा आएपछि भारतीय पर्यटकहरूलाई लक्षित गर्न थप सहज र आकर्षक हुने टुर व्यवसायीहरूले बताएका छन्।
रिसोर्टको निर्माण कार्य अन्तिम चरणमा पुगेको छ र आगामी केही महिनाभित्रै उद्घाटन गर्ने तयारी भइरहेको छ। व्यवस्थापन पक्षले सेवा गुणस्तरलाई अन्तर्राष्ट्रिय स्तरको बनाउने लक्ष्य लिएको छ। साथै, रिसोर्टमा पर्यावरण संरक्षणलाई प्राथमिकता दिइने, हरित प्रविधिको प्रयोग गरिने र स्थानीय उत्पादन र संस्कृतिको प्रवर्द्धन गरिने योजना रहेको छ।
मनकामना जाने भक्तजन र पर्यटकहरूका लागि यो नयाँ रिसोर्ट एक नयाँ आकर्षण बन्ने देखिएको छ। निकट भविष्यमा मनकामना अब केवल आस्थाको केन्द्र मात्र नभई उच्चस्तरीय आतिथ्य सेवाको नमुना पनि बन्ने संकेत देखिन थालेको छ।